ბლოკჩეინის განზრახვები: სრული გზამკვლევი

დღევანდელ ბლოკჩეინის სამყაროში ყველაფერი ტრანზაქციების გარშემო ტრიალებს — დიახ, ამ სფეროს 90% სწორედ მათზეა აგებული. ისეთი მოწინავე პროექტებიც კი, როგორიცაა Solana, NEAR და Polkadot, განვითარებული აპლიკაციების მიუხედავად, კვლავ ტრანზაქციებზე ორიენტირებულ არქიტექტურას ეყრდნობა. თუმცა საინტერესო ცვლილება იწყება: ბლოკჩეინის მომავალი სხვა მიმართულებით ვითარდება. დაივიწყეთ ტრანზაქციების ძველი მოდელი — ახალი თაობის დეცენტრალიზებულ პროტოკოლებში ძირითად კომპონენტად ბლოკჩეინის ტრანზაქციებს განზრახვები ანაცვლებს. წარმოიდგინეთ: ნაცვლად იმისა, რომ პროტოკოლს ზუსტად მიუთითოთ, როგორ შეასრულოს ნაბიჯების თანმიმდევრობა, უბრალოდ ბუნებრივად გამოხატავთ, რა გსურთ. მაგალითად, შეგიძლიათ პროტოკოლს უთხრათ: „მაქვს 14 LTC. განახორციელე არბიტრაჟი Litecoin-ით და ეცადე, 5% მოგება მომიტანო“. ან თუნდაც ასეთი უცნაური რამ სთხოვოთ: „გადაცვალე ჩემი BTC EMT-ზე ან სხვა ეგზოტიკურ ალტკოინზე, ოღონდ მხოლოდ იმ შემთხვევაში, თუ რიანა და კრის ბრაუნი ისევ ერთად იქნებიან“. დიახ, ამ ახალი არქიტექტურის წყალობით შეგიძლიათ რთულ პროცესებში აღარ ჩაეფლოთ და სისტემას მიანდოთ ყველაფრის ერთი მარტივი მოქმედებით შესრულება — მაშინაც კი, თუ საქმე ისეთ აბსურდულ რამეს ეხება, როგორიც შოუბიზნესის ამბებზე დამოკიდებული გარიგებებია. ბლოკჩეინის ტრანზაქციებიდან განზრახვებზე გადასვლა ქმნის გარემოს, სადაც პროტოკოლები რთულ მოთხოვნებს მარტივად ასრულებს, ბლოკჩეინთან ურთიერთობა კი უფრო მოქნილი და შემოქმედებითი ხდება. მომავალი ახლოვდება. 

რა არის განზრახვები ბლოკჩეინში?

2024 წლის მდგომარეობით ამ ეტაპამდე ჯერ არ მივსულვართ, თუმცა ზოგიერთი გადაწყვეტა, მაგალითად, DEX აგრეგატორები Portals.fi და Matcha XYZ, უკვე მიიწევს განზრახვებზე ორიენტირებული მიდგომისკენ: ისინი რთულ, მრავალსაფეხურიან პროცესებს ერთ მარტივ მოქმედებად აქცევენ. დავუშვათ, გინდათ, თქვენი კრიპტოვალუტა თქვენთვის მუშაობდეს და არა უბრალოდ საფულეში იდოს. მაგრამ ამჟამად მხოლოდ DAI გაქვთ. მეგობრისგან გაიგეთ, რომ თუ Lido პროტოკოლით ETH-ის სტეიკინგს განახორციელებთ, სანაცვლოდ stETH-ს მიიღებთ — ტოკენს, რომლის გამოყენებაც ვაჭრობისთვის, გასესხებისთვის ან სხვა მიზნებისთვის შეგიძლიათ და ამავდროულად სტეიკინგის ჯილდოებსაც მიიღებთ. თქვენი გეგმა? მარტივია, მაგრამ შესასრულებლად არც ისე იოლი. ჯერ სხვადასხვა DEX აგრეგატორსა და ბირჟაზე საუკეთესო კურსი უნდა მოძებნოთ. შემდეგ, როცა შესაფერის ვარიანტს იპოვით, DAI ETH-ზე უნდა გაცვალოთ. ბოლოს კი Lido პროტოკოლიც უნდა გამოიყენოთ, რომ ETH stETH-ად გადააქციოთ. ყველა ამ ნაბიჯის დასრულების შემდეგ შეიძლება დაფიქრდეთ, სწრაფი გაცვლა გინდოდათ თუ შემთხვევით ნახევარ განაკვეთზე სამსახური იშოვეთ.

განზრახვებზე ორიენტირებული სისტემებით შეგიძლიათ ყველა ეს დამღლელი ნაბიჯი გამოტოვოთ. ამის ნაცვლად, უბრალოდ ხელს აწერთ ერთ განზრახვას: „მინდა ჩემი DAI stETH-ზე გავცვალო“, დანარჩენზე კი სისტემა ზრუნავს. 

კულისებში Matcha-ს მარშრუტიზაციის ჭკვიანი ალგორითმი 4D ჭადრაკის ოსტატივით მუშაობს: რამდენიმე დეცენტრალიზებულ ბირჟაზე საუკეთესო მარშრუტებს პოულობს, გაზის ხარჯებს ითვლის და სასურველ stETH-ს პირდაპირ თქვენს საფულეში რიცხავს — ისე, რომ არაფრის გაკეთება არ გიწევთ. ანალოგიურად, Portals.fi ამარტივებს სხვადასხვა DeFi პროტოკოლში ოპერაციებს, როგორიცაა გაცვლა, შემოსავლის ფარმინგი და ლიკვიდობის პულებში თავმოყრა, ხოლო ფონურ რეჟიმში საუკეთესო მარშრუტებსა და ფასებს არჩევს. არსებითად, თქვენ მხოლოდ ამბობთ, რა გსურთ, მაგალითად, „გაცვალე DAI stETH-ზე“, სისტემა კი ყველა რთულ დეტალს თავად აგვარებს. ამგვარად, მისი გამოყენება განზრახვებზე დაფუძნებულ სისტემასთან ურთიერთობას ემსგავსება.

არც განმეორებითი მოქმედებები. არც დამატებითი დადასტურებები. მხოლოდ მარტივი, ოპტიმიზებული გაცვლა სოლვერების დახმარებით — მათ მოგვიანებით განვიხილავთ და ტერმინის მნიშვნელობასაც ავხსნით. ყველაფერი ერთ ტრანზაქციაში ერთიანდება.

საქმე ისაა, რომ სმარტ-კონტრაქტების განზრახვები ახალი იდეა არ არის, თუმცა ბლოკჩეინის სამყაროში ყურადღება მხოლოდ ახლახან მიიპყრო. მათ სხვადასხვანაირად მოიხსენიებენ: პროგრამირებადი ფასის შეთავაზებები, RFQ სისტემები, სურვილების თანხვედრა და სხვა. მართალია, თითოეულ ამ ტერმინს თავისი ნიუანსები აქვს, მაგრამ განზრახვები დღეს ორ მთავარ ამოცანას კარგად ართმევს თავს: აუმჯობესებს მომხმარებლის გამოცდილებას და ფასის განსაზღვრაში გეხმარებათ. გახსოვთ, როცა რთული კრიპტოტრანზაქციები რუბიკის კუბის თვალახვეულად აწყობას ჰგავდა? განზრახვები ამ პროცესს ამარტივებს, გეხმარებათ შესაფერისი შეთავაზების შესაფერის ფასად პოვნაში და უზრუნველყოფს, რომ სისტემით სარგებლობა ყოველთვის მაქსიმალურად მოსახერხებელი იყოს.

გაეცანით ეკოსისტემაში არსებულ განზრახვებზე ორიენტირებულ გადაწყვეტებს, შემდეგ ნაწილებში კი განვიხილავთ, რომელი მათგანი რაზეა პასუხისმგებელი.

განზრახვაზე ორიენტირებული სისტემის არქიტექტურა 

თუ ტრანზაქციებზე ორიენტირებული მიდგომიდან განზრახვებზე ორიენტირებულ მიდგომაზე გადასვლა გვინდა, ჯერ ამ ორ ცნებას შორის მთავარი განსხვავება უნდა გავიგოთ. ტრანზაქციები GPS-ის მარშრუტის მიყოლას ჰგავს — დანიშნულების ადგილამდე მისასვლელად ყველა მოსახვევს წინასწარ გეგმავთ: „ჯერ ამ გზით წადით, შემდეგ — იმ გზით“. ყველაფერი წინასწარ არის განსაზღვრული და ცვლილების საშუალებას არ იძლევა. სმარტ-კონტრაქტების განზრახვები კი უფრო ჰგავს იმას, როცა აპლიკაციით გამოძახებულ მძღოლს ეუბნებით, სად გსურთ მისვლა, საუკეთესო მარშრუტის არჩევას კი მას ანდობთ. უბრალოდ ამბობთ: „1 ETH მინიმუმ 2 000 USDC-ზე გამიცვალეთ“, სისტემა კი შესრულების დეტალებზე ზრუნავს. აქ მთავარი ყოველი წვრილმანის მართვა კი არა, სასურველ შედეგზე ფოკუსირებაა.

ტექნიკური თვალსაზრისით, ტრანზაქციები მკაფიოდ არის განსაზღვრული და ამიტომ იმპერატიულია — ვირტუალურ მანქანაში ტრანზაქციის შესასრულებლად საჭირო ყველა ფუნქცია წინასწარ არის დადგენილი. განზრახვები კი განსაზღვრავს, როგორ უნდა შეიცვალოს საბოლოო მდგომარეობა, მაგრამ არა ამ შედეგის მისაღწევად საჭირო კონკრეტულ ნაბიჯებს, ამიტომ ისინი დეკლარაციულია. ეს მიდგომა მეტ მოქნილობასა და ავტომატიზაციას უზრუნველყოფს, რადგან მკაცრი ინსტრუქციების გარეშე სისტემა თავად ირჩევს განზრახვის შესრულების ოპტიმალურ გზას. არქიტექტურის თვალსაზრისით კი ორი ძირითადი კომპონენტი გვაქვს: განზრახვის დაფიქსირება და განზრახვის შესრულება. 

განზრახვის დაფიქსირების ეტაპზე სისტემა ჯერ ადგენს, რისი მიღწევა სურს მომხმარებელს. ამ პროცესში მნიშვნელოვან როლს ასრულებს ისეთი სამომხმარებლო ინტერფეისები, როგორიცაა 1inch და CoW Swap. ისინი მომხმარებლებს განზრახვის ჩამოყალიბებაში ეხმარება, აცნობს შესაძლო ვარიანტებს და შემდეგ ამ ინფორმაციას შესასრულებლად გადასცემს. თუმცა ეს ინტერფეისები ხშირად მხოლოდ განზრახვის დაფიქსირებით არ შემოიფარგლება — მათ შესრულების პროცესთან დაკავშირებული სხვა ამოცანების მართვაც შეუძლიათ.

განზრახვის დაფიქსირების შემდეგ მისი შესრულების ეტაპზე გადავდივართ. აქ დაფიქსირებული განზრახვა გამოძახების მონაცემებად გარდაიქმნება და მცირე, შესრულებად ლოგიკურ მოდულებად იყოფა. ამ ეტაპზე პროცესში ერთვება ქვემოთ აღწერილი კომპონენტები, რომელთაგან თითოეულს განზრახვის კოორდინირებულად შესრულებაში თავისი წვლილი შეაქვს. ზოგადად, მაძიებლები ყველაზე მომგებიან შესაძლებლობებს პოულობენ, რეზოლვერები მარშრუტებს გეგმავენ, სოლვერები მარშრუტზე ყველა ტრანზაქციას ასრულებენ, ტეიკერები უშუალოდ ლიკვიდობის პულებთან ან ბაზრებთან ურთიერთქმედებენ, ხოლო ფილერები ძირითადად ორდერების ნაწილებად დაყოფასა და ამ ნაწილების შესრულებაზე მუშაობენ.

და კიდევ ერთი რამ, სანამ დეტალებზე გადავალთ: მნიშვნელოვანია აღვნიშნოთ, რომ 2024 წლის მდგომარეობით, ზოგიერთი კომპონენტის ფუნქციებს შორის ზღვარი ხშირად ბუნდოვანია. ხშირ შემთხვევაში ერთ პროდუქტს რამდენიმე ამოცანის ერთდროულად შესრულება შეუძლია.

განზრახვის შესრულების ეტაპი

მაძიებლები

მაძიებლები ხშირად დამოუკიდებელი ოპერატორების მიერ მართული ბოტებია. ისინი მზვერავებივით მოქმედებენ — ქსელს ამოწმებენ და მომხმარებლის განზრახვის შესაბამის მომგებიან შესაძლებლობებს ეძებენ. მაგალითად, ორდერების წიგნზე დაფუძნებულ დეცენტრალიზებულ ბირჟაზე (DEX) მაძიებელს შეუძლია იპოვოს არბიტრაჟის შესაძლებლობები ან ლიკვიდური ბაზრები, სადაც განზრახვა ეფექტიანად შესრულდება. მაძიებლები განსაკუთრებით მნიშვნელოვანია MEV-ის (მაქსიმალური ამოსაღები ღირებულების) სტრატეგიებისთვის ან ისეთი შესაძლებლობების აღმოსაჩენად, რომლებიც ერთი შეხედვით აშკარა არ არის. საუკეთესო შესაძლებლობების პოვნის შემდეგ ისინი ინფორმაციას სოლვერებს ან რეზოლვერებს გადასცემენ, რათა შესრულება დასრულდეს. მაძიებლები მუდმივად ეძებენ დამატებითი მოგების დაფარულ შესაძლებლობებს, რომ მომხმარებლისთვის შედეგი გააუმჯობესონ. თუმცა, 2024 წლის მდგომარეობით, მაძიებლების საქმიანობა კვლავ შეიძლება უკავშირდებოდეს საზიანო ქმედებებს, განსაკუთრებით მაქსიმალური ამოსაღები ღირებულების (MEV) კონტექსტში. Flashbots MEV-ის ეკოსისტემაში ერთ-ერთი ყველაზე ცნობილი პლატფორმაა. ეს პროგრამული უზრუნველყოფა განსაზღვრული წესებისა და ეთიკური პრინციპების ფარგლებში მუშაობს და ცდილობს MEV-ის საზიანო შედეგების შემცირებას: ღირებულების ამოღებისთვის უფრო ეფექტიან გზას უზრუნველყოფს, რომელიც ქსელის მუშაობას ნაკლებად აფერხებს.

რეზოლვერები

რეზოლვერები ხშირად სმარტ-კონტრაქტების სახითაა დანერგილი, თუმცა შეიძლება მოიცავდეს ბლოკჩეინის გარეთ მოქმედ ალგორითმებს ან სერვისებსაც, რომლებიც გადაწყვეტილების მიღებაში მონაწილეობენ. მათი მთავარი ამოცანაა, განსაზღვრონ, რომელი სოლვერი, მარშრუტი ან რესურსების კომბინაცია უნდა გამოიყენონ განზრახვის მაქსიმალურად ეფექტიანად შესასრულებლად. რეზოლვერები ოპერაციის მთავარ სტრატეგებად წარმოიდგინეთ — ერთგვარ უოლტერ უაიტებად: ისინი რამდენიმე შესაძლო მარშრუტს აფასებენ და ყველაზე ეფექტიანს ან მომგებიანს ირჩევენ. მაგალითად, Balancer-ის Smart Pools წინასწარ განსაზღვრული სტრატეგიების მიხედვით აქტივების განაწილებას დინამიკურად აბალანსებს. პულის ლოგიკა განსაზღვრავს, როგორ მართოს აქტივები ყველაზე ეფექტიანად, მომხმარებლის განზრახვის შესაბამისად. Zerion DeFi პორტფელის მართვის პლატფორმაა, რომელიც ტოკენების გაცვლისას რეზოლვერის ფუნქციასაც ასრულებს. ის რამდენიმე წყაროდან აერთიანებს ლიკვიდობას და გარიგებების შესასრულებლად საუკეთესო მარშრუტებს არჩევს, როგორც ხარჯების, ისე ტრანზაქციის სიჩქარის გათვალისწინებით.

სოლვერები

სოლვერები შეიძლება იყოს სმარტ-კონტრაქტები, ბოტები ან ალგორითმები — არსებითად, ნებისმიერი სისტემა, რომელსაც განზრახვის სრულად შესრულება შეუძლია. როდესაც Uniswap-ზე აქტივებს ცვლით, ეს შეიძლება ერთ მოქმედებად მოგეჩვენოთ, თუმცა სინამდვილეში შეიძლება რამდენიმე ეტაპს მოიცავდეს, რომლებსაც ავტომატური მარკეტმეიკერი (AMM) ფონურ რეჟიმში ასრულებს: ლიკვიდობის პულებში ფასების განსაზღვრას, გაცვლის მარშრუტის რამდენიმე პულზე გავლით დაგეგმვასა და ლიკვიდობის ოპტიმიზაციას. ისეთ დეცენტრალიზებულ ბირჟებზე (DEX), როგორიცაა SushiSwap, ავტომატური მარკეტმეიკერები (AMM) სოლვერების როლს ასრულებენ: მათემატიკური ფორმულებისა და ალგორითმების დახმარებით ადგენენ აქტივების ფასებს და ვაჭრობისთვის ლიკვიდობას უზრუნველყოფენ. შემოსავლიანობის ოპტიმიზატორები, როგორიცაა Yearn Finance, Harvest Finance და Alpha Homora, ასევე სოლვერების ფუნქციას ასრულებენ და მომხმარებლებს დეცენტრალიზებული ფინანსების (DeFi) პლატფორმებზე მაქსიმალური შემოსავლის მიღებაში ეხმარებიან. ეს პლატფორმები ავტომატურად აანალიზებენ სხვადასხვა პროტოკოლში სესხის გაცემისა და სტეიკინგის შესაძლებლობებს და სახსრებს ყველაზე მომგებიან ვარიანტებს შორის ანაწილებენ.

ტეიკერები

ტეიკერები ამ არქიტექტურაში უშუალო შემსრულებლები არიან. წარმოიდგინეთ ისინი სმარტ-კონტრაქტების მსგავსად, რომლებიც Uniswap-ზე ავტომატურ გაცვლებს ასრულებენ, თუმცა ტეიკერები შეიძლება ბლოკჩეინის გარეთ მოქმედი მონაწილეებიც იყვნენ, მაგალითად, საარბიტრაჟო ბოტები. მათი ამოცანაა, განზრახვის შესასრულებლად უშუალოდ იურთიერთქმედონ ბლოკჩეინში ან მის გარეთ მოქმედ სისტემებთან. მარტივად რომ ვთქვათ, ისინი „იღებენ“ ლიკვიდობას ან სოლვერებისა თუ რეზოლვერების მითითებების საფუძველზე კონკრეტულ მოქმედებებს ასრულებენ. მაგალითად, დეცენტრალიზებულ ბირჟაზე ტეიკერმა შეიძლება ორდერი შეასრულოს ლიკვიდობის პულებთან ან სხვა ტრეიდერებთან ურთიერთქმედებით. არსებითად, ტეიკერები მანამდე მიღებულ გადაწყვეტილებებს ახორციელებენ და განზრახვის სრულად შესრულებას უზრუნველყოფენ.

ფილერები

ფილერები უფრო მცირე ნაწილების შესრულებაზე არიან პასუხისმგებელი, განსაკუთრებით მაშინ, როდესაც განზრახვა ნაწილობრივ სრულდება. დავუშვათ, განზრახვა დიდი რაოდენობის ტოკენების გაცვლას ითვალისწინებს. ფილერები ამ მოცულობის მცირე ნაწილებს მართავენ და უზრუნველყოფენ ტრანზაქციის თითოეული ნაწილის ეფექტიანად შესრულებას — როგორც ერთ, ისე რამდენიმე პლატფორმაზე. ისინი სხვადასხვა წყაროდან ლიკვიდობის გაერთიანებას ან მრავალეტაპიანი პროცესების ეტაპობრივად დასრულებას უწყობენ ხელს. არსებითად, ფილერები უზრუნველყოფენ, რომ განზრახვის შესრულებისას არცერთი ნაწილი არ დარჩეს შეუსრულებელი, მაშინაც კი, როცა საქმე რთულ, რამდენიმე მარშრუტის მქონე სტრატეგიებს ეხება. ხშირად ფილერები ჰიბრიდული სისტემის ნაწილია, რომელშიც ბლოკჩეინზე მომუშავე კომპონენტები (სმარტ-კონტრაქტები) და ბლოკჩეინის გარეთ მოქმედი კომპონენტები ერთად მუშაობენ.

რა იქნება შემდეგ?

განზრახვებზე დაფუძნებულ ბლოკჩეინებზე გადასვლა ბლოკჩეინის არქიტექტურის განვითარების მნიშვნელოვანი ეტაპია. ტრადიციული, ტრანზაქციებზე დაფუძნებული სისტემებისგან განსხვავებით, რომლებიც მომხმარებლებს პროცესის ყოველი ნაბიჯის განსაზღვრას სთხოვენ, განზრახვაზე ორიენტირებული მოდელები ყურადღებას ამახვილებენ იმაზე, თუ რისი მიღწევა სურს მომხმარებელს და არა იმაზე, თუ როგორ უნდა მიაღწიოს ამას. ეს პროტოკოლები მაღალკვალიფიციური ასისტენტებივით მოქმედებენ: რთულ ტექნიკურ საკითხებს თავად აგვარებენ და მომხმარებლებს საშუალებას აძლევენ, მხოლოდ საკუთარ მიზნებზე კონცენტრირდნენ.

მაგალითად, Anoma განზრახვებზე ორიენტირებული არქიტექტურის ერთ-ერთი წამყვანი მაგალითია. ის მომხმარებლებს საშუალებას აძლევს, გამოხატონ განზრახვა, მაგალითად, ერთი აქტივის მეორეზე გაცვლა, შესრულების დეტალებზე ზრუნვის გარეშე. Anoma იყენებს დეცენტრალიზებულ სოლვერებს, რომლებიც სისტემის შიდა ლოგიკას მართავენ და განზრახვის შესასრულებლად ყველაზე ეფექტიან მარშრუტს ირჩევენ. შედეგად, სისტემასთან ურთიერთქმედება უფრო მარტივი ხდება და მომხმარებლებს აღარ უწევთ ტრანზაქციის ყოველი დეტალის მართვა.

Essential მსგავს გადაწყვეტას გვთავაზობს, თუმცა აქცენტს სხვადასხვა DeFi პროტოკოლის ერთიან პროცესში ინტეგრაციაზე აკეთებს. კონკრეტული სფეროსთვის განკუთვნილი საკუთარი ენის (DSL) გამოყენებით Essential მომხმარებელთა განზრახვებს აფიქსირებს და რეზოლვერებს გადასცემს, რომლებიც მათი შესრულების საუკეთესო გზას განსაზღვრავენ. იქნება ეს სტეიკინგი, გაცვლა თუ სესხის გაცემა, Essential მთელ ოპერაციას ერთიან, ოპტიმიზებულ პროცესად აქცევს და მას ეფექტიანსა და მომხმარებლისთვის მარტივს ხდის.

Banana HQ განზრახვებზე დაფუძნებულ ურთიერთქმედებას შემოქმედებითად უდგება და მომხმარებლებს ინდივიდუალურ საჭიროებებზე მორგების ფართო შესაძლებლობებს სთავაზობს. ის რთული პირობების განსაზღვრის საშუალებას იძლევა — მაგალითად, გარიგება მხოლოდ მაშინ შესრულდეს, როცა კონკრეტული საბაზრო პირობები დაკმაყოფილდება. ეს მოქნილობა სხვადასხვა სფეროზე ვრცელდება, დეცენტრალიზებული ფინანსებიდან თამაშებამდე, რაც გამოცდილებას უფრო პერსონალიზებულს და ინდივიდუალურ საჭიროებებზე მორგებულს ხდის.

განზრახვებზე დაფუძნებულ სისტემებზე ფართომასშტაბიანი გადასვლა ბლოკჩეინის სფეროს გარდაქმნის და ხისტ ტრანზაქციულ მოდელებს უკან ტოვებს. თუ ყურადღებას მომხმარებლების სასურველ შედეგებზე გავამახვილებთ და დეტალებზე ზრუნვას სისტემას მივანდობთ, შევძლებთ უფრო ინტუიციური, მოქნილი და ძლიერი პროტოკოლების შექმნას. ამგვარად, ბლოკჩეინში განზრახვების გამოყენების მომავალი რეალობად იქცევა. განვითარებასთან ერთად, ეს სისტემები, სავარაუდოდ, გადამწყვეტ როლს შეასრულებს დეცენტრალიზებული ტექნოლოგიის დანერგვასა და მისი ხელმისაწვდომობის გაზრდაში. როცა ეს სისტემები საკმარისად განვითარებული იქნება, ისინი, სავარაუდოდ, გადამწყვეტ როლს შეასრულებს დეცენტრალიზებული ტექნოლოგიის უფრო ხელმისაწვდომად და ეფექტიანად ქცევაში და ძირეულად შეცვლის ბლოკჩეინთან ჩვენი ურთიერთქმედების გზებს.